Að hreinsa harðvið
Aðferð – hreinsun
Athugið að áður en harðviður er olíuborinn skal nota sömu hreinsiaðferð hvort sem viðurinn er nýr og ómeðhöndlaður (sérstaklega tannín- og olíuríkur viður) eða grámaður viður með gamalli olíu. Ef lakkfilma er á viðnum og grámi undir henni getur þurft slípun eða málningaruppleysi fyrst til að fjarlægja lakkfilmuna. Hreinsiefnin sem nefnd eru hér fyrir neðan leysa ekki upp málningu.
- Bleytið flötinn vel með vatni, berið Tinova Wood Cleaner pallahreinsinn á viðinn með pensli, kústi eða rúllu. Notið hanska. Látið hreinsinn liggja á viðnum í 15-30 mínútur. Forðist að láta flötinn þorna á meðan því virknin í efninu hættir ef flöturinn þornar.
- Beitið léttum háþrýstiþvotti eða skrúbbið flötinn vandlega með kústi, 2-3 metra í einu. Skolið flötinn vel með vatni uns allt hreinsiefnið hefur verið fjarlægt. Ef óhreinindin hafa ekki horfið að fullu má endurtaka þvottinn. Við þessa hreinsun dökknar viðurinn mikið.
- Til að ná fram upprunalegum lit á harðviðinn skal bera Xyladecor harðviðarhreinsinn þykkt á rakan viðinn strax eftir hreinsun með Tinova Wood Cleaner. Látið efnið liggja á fletinum þar til hann hættir að lýsast eða í um 20 mínútur.
- Hreinsið flötinn vandlega með vatni og hörðum svampi eða stífum kústi til að ná litnum á viðnum sem jöfnustum. Hægt er að nota léttan háþrýstiþvott, en með varúð, svo viðurinn strikist síður eða ýfist upp.
- Slípið yfir yfirborðið með sandpappír nr. 80-100. Gott er að nota þar til gerð slípibretti á skafti.
Látið yfirborðið þorna vel í að minnsta kosti 3-5 daga eftir aðstæðum áður en olían er borin á.
*Fylgið verklýsingunni „Að bera olíu á harðvið“ að lokinni hreinsun
Heilsufars- og umhverfismál
Ekki láta málningardósina standa opna meðan á verki stendur. Þrífið verkfæri strax eftir notkun. Athugið að kviknað getur í olíublautum tuskum og tvisti af sjálfu sér og verður að bleyta þær með vatni áður en þeim er hent á öruggan stað. Hellið ekki málningar- og hreinsiefnaleifum í niðurföll. Skilið efnaleifum og tómum umbúðum til endurvinnslustöðva.
Tæknilegar upplýsingar
PALLAHREINSIR: Nordsjö Tinova Wood Cleaner
Tegund: Alkalískur viðarhreinsir
Þynning: Notið helst óþynnt
Verkfæri: Penslar, kústar, rúllur
Efnisnotkun: Um 5-6 m2/l; efnismagn fer eftir vinnsluaðferð, tegund og ástandi viðarins
Athugið: Tinova Wood Cleaner ætir gler, ál og fleti sem eru viðkvæmir fyrir alkalí
HARÐVIÐARHREINSIR: Xyladecor Ontgrijzer
Tegund: Súrt hreinsihlaup
Þynning: Notið óþynnt
Verkfæri: Penslar, rúllur, kústur, stífur
svampur. Hreinsið verkfæri með vatni strax að lokinni notkun
Efnisnotkun: Allt að 8 m2/l; efnismagn fer eftir vinnsluaðferð, tegund og ástandi viðarins
