
Elmcote Herball - Morris & Co
Elmcote Herball – Morris & Co
Enski fjöllistamaðurinn William Morris, sem var í fararbroddi í list- og handíðahreyfingunni (Arts and Crafts) á 19. öld, er sérstaklega þekktur fyrir veggfóðurshönnun sína. Áherslur hans voru á náttúruleg form og lífræna hönnun í daglegu lífi almennings, með stílfærðum blómum, plöntum, fuglum, ávöxtum og fleiri náttúrumótífum. Þessi mikli hugsjónamaður skildi eftir sig um 50 mynstur sem höfðu mikil áhrif á innanhússhönnun almennt, t.d. gætir áhrifa hans greinilega í Art Nouveau, sem er beinn forveri Art Deco stílsins. Fingraför Morris eru greinileg í mynsturgerð enn þann dag í dag enda hefur hann oft verið nefndur faðir veggfóðursins.
Elmcote er magnað og gróskumikið veggfóður, hannað árið 1900. J.H Dearle, hægri hönd Morris og lærlingur í veggteppamynstrum, á heiðurinn af þessu veggfóðri. Það sýnir tilkomumikla fræhausa og smágerð blóm umkringd laufblöðum sem þyrlast um í klassískum Dearle stíl. Veggfóðrið var endurvakið til framleiðslu vegna samstarfs Morris & Co við safnið Emery Walker´s House en Sir Emery Walker var virtur leturgerðarmaður, bókaprentari og náinn vinur William Morris.
Athugið að mælt er með að setja límið á bakhlið veggfóðurs, ekki beint á vegginn. Þrífið límbletti af með hreinu vatni og mjúkum svampi ÁÐUR en límið þornar. Lesið leiðbeiningar vel eða fáið fagmann í verkið.
37.892 kr. rúlluverð
Í boði sem biðpöntun